<<3 + 3>>հարթակի հաջորդ հանդիպումը տեղի կունենա Թուրքիայում. Անկարան ակնկալում է Վրաստանի մասնակցությունը
Հարավային Կովկասի վերաբերյալ «3 + 3» հարթակի հաջորդ հանդիպումը տեղի կունենա Թուրքիայում, Անկարան հույս ունի, որ Վրաստանը նույնպես կմասնակցի։ Իսլամաբադում նման հայտարարություն է արել Թուրքիայի արտգործնախարար Մևլութ Չավուշօղլուն՝ Աֆղանստանում Իսլամական համագործակցության կազմակերպության ԱԳ նախարարների 17-րդ արտահերթ նիստից հետո, հայտնում է ՏԱՍՍ-ը։«Պարոն Ջեյհուն Բայրամովը և ես քննարկել ենք (Ադրբեջանի նախագահ Իլհամ) Ալիևի և (ՀՀ վարչապետ Նիկոլ) Փաշինյանի հանդիպումը Բրյուսելում, 3+2 հարթակի հանդիպումը Մոսկվայում, որն անցկացվել է փոխարտգործնախարարների մակարդակով։ Դրան չի մասնակցել Վրաստանը, սակայն հավատում ենք, որ նա կմասնակցի հաջորդ նիստին, որը, ինչպես մենք ակնկալում ենք, տեղի կունենա Թուրքիայում», – նշել է ԱԳ նախարարը։
Իդեպ, այսօր Ադրբեջանի և Թուրքիայի արտաքին գործերի նախարարներ Ջեյհուն Բայրամովը և Մևլութ Չավուշօղլուն կիրակի օրը քննարկել են «3+3» ձևաչափով տարածաշրջանային համագործակցության հարթակի ներդրումը (Ադրբեջան, Հայաստան, Վրաստան, Ռուսաստան, Թուրքիա, Իրան): Հանդիպումը կայացել է Իսլամաբադում Իսլամական համագործակցության կազմակերպության արտաքին գործերի նախարարների խորհրդի արտահերթ նիստի շրջանակում:
«Կողմերը քննարկել են 3+3 համագործակցության ձևաչափի առաջին հանդիպման արդյունքները, որը նախաձեռնել էին Ադրբեջանի և Թուրքիայի ղեկավարները: Շահագրգռվածություն է հայտնվել այդ համագործակցության մեխանիզմը խթանելու հարցում»,- ասվում է հաղորդագրության մեջ:
Ադրբեջանի ԱԳՆ-ից հայտնում են, որ նախարարները քննարկել են նաև Հարավային Կովկասում տիրող իրավիճակը, Ղարաբաղի շուրջ եռակողմ պայմանավորվածությունների կատարման ընթացքը, հետհակամարտային շրջանում տարածաշրջանի երկրների միջև հարաբերությունների կարգավորման հարցեր։