ԴԻ ԿԱՊՐԻՈՆ ՓՐԿԵԼ Է ԻՐ ՇՆԵՐԻՆ՝ ՆԵՏՎԵԼՈՎ ՍԱՌՑԵ ԼԻՃԸ

Լեոնարդո դի Կապրիոն փրկել է իր շներին՝ նրանց հետևից նետվելով սառցե լիճը։ Այս մասին պատմել են «Մի նայիր վերև» ֆիլմից նրա գործընկերները։ Հարցազրույցից հատվածներ է հրապարակել Entertainment Weekly-ն։

Դեպքը տեղի է ունեցել Բոստոնում: Ֆիլմի վրա աշխատելու ընթացքում ամերիկացի դերասանն ապրել է վարձակալած տանը՝ լճի ափին։ Նրա հետ միասին եղել են նրա երկու շները` լայկաները։ Մի անգամ նրանցից մեկը որոշել է լողալ սառած լճում։ Երկրորդը շտապել է նրա հետևից։ Դի Կապրիոն ստիպված է եղել մտնել սառցե ջուրը՝ ընտանի կենդանիներին ափ հանելու համար։

Դերասանը կարծում է, որ շները պարզապես չեն հասկացել, որ ջուրը սառն է։ Կենդանիները մեծացել են Կալիֆորնիայում և երբեք նման բան չեն տեսել: Աստղի գործընկերները Լեոյի ընտանի կենդանիներին բնութագրում են որպես «իսկական տորնադո»: Լայկաներն անընդհատ ինչ-որ բան են փչացնում ու խուլիգանություն անում։ Օրինակ, վերջերս պատառոտել են դերասանի տան բազմոցը: